85 Views  
සරස්වතිය වැඩහිඳින දියඇල්ලට නම් තුනයි


තවලන්තැන්නෙන් දෙපැත්තට හැරිලා ප්‍රධාන නගර දෙකකට යන්න පුළුවන්. එකක් තලවකැලේ, අනෙක නුවරඑළිය. තවලන්තැන්නෙන් තලවකැලේට යන්න තියෙන පාරේ ගියාම තමයි පූඬලුඔය කුඩා නගරය මුණගැහෙන්නේ. පූඬලුඔය නගරය පහුකරලා තව කිලෝමීටරයක් විතර ගියාම තියෙනවා වම් අත පැත්තට පාරක්. මේ පාර තමයි එකම පාර අර උඩින් කිව්ව තවලන්තැන්න - නුවරඑළිය මාර්ගයත් තවලන්තැන්න - තලවකැලේ මාර්ගයත් දෙක එකට එකතු කරන. දැන් අපිට මේ මාර්ගය වැදගත් ඒ නිසාද.. නෑ. මේ පූඬලුඔය - නුවරඑළිය මාර්ගයේ තමයි අද අපි බලන්න යන අපූරැ දියඇල්ල තියෙන්නේ. මේකටත් නම් තුනක් තියෙනවා. කට්ටියක් මේක පූඬලුඔය ඇල්ල කියලා කියනවා. තව කට්ටියක් මේකට ඩන්සිනන් ඇල්ල කියලා කියනවා. තවත් පිරිසක් මේකට ෂීන් ඇල්ල කියලා කියනවා. කොහොම හරි, මේ තමයි පූඬලු ඔයෙන් නිර්මාණය වුණු අපූරැ ඩන්සිනන් ඇල්ල.

2016-12-15-ent-21කිව්වා වගේ, මේක පූඬලු ඔයෙන් නිර්මාණය වුණ නිසා මේකට පූඬලු ඔය ඇල්ල කියලා කියනවා. මේ ඇල්ල දෙපැත්තේ තියෙන්නේ විශාල තේ වතු දෙකක්. එකක් ඩන්සිනන් වත්ත. අනෙක තමයි ෂීන් වත්ත. මෙන්න මේ වතු දෙකේ නම් නිසා තමයි ඇල්ලට අනිත් නම් හම්බවෙලා තියෙන්නේ. මේ ඇල්ල අසලම තිබෙන හින්දු දේවාලය හා දේවාලයේ එක් සරස්වතී පිළිමයක් දියඇල්ල මැද තබා තිබීම කියන දේවල් නිසාත් ඇල්ලට සුවිශේෂිත්වයක් ලැබිලා තියෙනවා. එක අතකට ඒක එක්තරා පූජනීයත්වයක්. කොහොම හරි මේ පූඬලු ඔය ඇල්ල නුවරඑළිය දිස්ත්‍රික්කයේ කොත්මලේ ප්‍රදේශිය ලේකම් කොට්ඨාසයේ තමයි පිහිටලා තියෙන්නේ. ඒ වගේම මේ ඇල්ලත් අපි ගිය සතියේ ගිය කඩියන්ලෙන ඇල්ල වගේ තට්ටු තුනකට තමයි පිහිටලා තියෙන්නේ. ඇල්ලේ තට්ටු තුනෙන් ඉහළම තට්ටුව, ඒ කියන්නේ පූඬලුඔය - නුවරඑළිය මාර්ගයේ යද්දි පෙනෙන කොටස තමයි උසින් අඩුම නමුත් ලස්සනම කොටස. ඒ කොටස සාමාන්‍ය ඇල්ලකට වඩා පළලින් වැඩියි. හැබැයි උසින් අඩුයි.

ඇල්ලේ ඉතිරි කොටස් දෙකත් එක්කම ගත්තාම මේක අඩි 330ක් පමණ උසින් යුක්තයි කියලා තමයි පොතේ තියෙන්නේ. ඈත ඉඳලා බැලුවාම ඇල්ලේ තට්ටු තුන් හා පළවෙනි - දෙවෙනි තට්ටු මැදින් වැටිලා තියෙන ප්‍රධාන මාර්ගය අපූරැවට දකින්න පුළුවන්. මෙරට මෙන්ම විදෙස් රටවල සිට එන සංචාරකයින්ගෙනුත් විශාල ආකර්ෂණයක් මේ ඇල්ලට තියෙනවා. ඇත්තටම සොබාදහමේ හරිම අපූරැ නිර්මාණයක් වූ මේ පූඬලු ඔය ඇල්ල දකින්නට වරක් හෝ ඔබ යායුතුයි කියන එකයි අවසාන වශයෙන් කියන්න තියෙන්නේ.

saaravita.lk


o